Sitoveneto.org - Portale di cultura veneta

(Parlada e grafia orixinaria de l'autor)
(Silvana Dal Cero)

(Vèneto - Parlade Vènete Unificàe)
(L-tajà fra voca£i ; £e voc. fina£i "-o / -e " £e pol èser mute
anca se scrite: tuto=tut'...note=not' ; s /x -zs /zx rego£arixàe)

Me tera

Te sento, me tera, ‘nte 'l aria de majo:
uduri de erba pena tajà,
de erba che séca, de fen deventà, ma…
me manca la vóxe de l’omo che fis-cia
fin ch 'l pasa el fero par mejo tajar.

Te sento, me tera, ‘nte l’aria de bósco:
uduri de mus-cio, de fóje secae, ma…
me manca le vóxe de tuxi che gira,
che serca xugando castagne ’ntel prà.

Te sento, me tera, ‘nte l' odóre de ua,
de mósto, de bruma, de otóbre rivà, ma…
me manca la xente che canta laorando.
‘Nte l’aria che ormai d’inverno la sa
no sento pi ridare, schersare, cantare.
No sento pi el gusto dei tempi pasai.

‘Ndo ghemo lasà la voja de vivare,
de gòder de póco, col suór guadagnà?
Parché pi la xente no sa darse ‘na man
come coando la vita la xera pi dura,
e xa solo jutàndose se sentia manco mal?

L’odór de polenta on po’ brustolà
de fógo che scalda le sére invernae.
Le vóxi de xente che cónta le storie,
tra el vero el sognà,
fin tanto che fora, col vento che fis-cia,
vien xo tanta neve da cuèrdere i pra.

‘Ndo’ ela la xente de questa me tera,
la xente de core, che ride, che xuga
anca quando el suor el segna ‘nte 'l vixo
le stajon che le pasa portando el doman.