Sitoveneto™ - portale di lingua e cultura veneta

Cósa che xe Sitoveneto
Roberto Astuni, Luciano Brunelli e Silvana Dal Cero i xe quii che ga promoso 'sta inizsiativa qua co l'obietivo de coordinar le asociazsion culturali che ghe xe sul teritorio. Considerando l'inportanzsa de la publisità e del scanbio de informazsion ai nostri giorni, i ga pensà de crear un pónto de riferiménto par quii che i xe inpegnài in modo volontario in 'sto setor qua, fazsilitando el scanbio de informazsion, favorendo eventuali fórme de colaborazsion, creando 'na réte de conosenzse fra i grupi stési, in modo che in ognun posa crésare la consapevolézsa de la varietà de le proposte culturali che ofre la nostra region.

Scopo
£a realtà vèneta la xe varia, ma la xe póco conosùa dai italiani e anca da noaltri vèneti. Xe duro a morir el cliche' del Vèneto ignorante, che no'l xe bon de parlar italian (come se l' italian el fuse l' ùnica léngua culturale), inpegnà solo che a far "schei", lontan dal móndo de la cultura. Ma par canbiar idèa basta vardarse intorno co ocio atento e se véde un móndo vivo, che inpégna un saco de zxente in atività culturali de tuti i tipi. Questo xe quel che noaltri ghémo fato e sùbito ghémo visto la necesità de unir forzse, energìe, conosenzse, abilità, informazsion par poder rèndare vixìbile el pi posìbile el lato poètico, artìstico, creativo de l'ànimo vèneto. Xe rivà davero el moménto de èsare consapévoli de le nostre potenzsialità e de èserghene giustamente orgoliuxi. Solo cusì podarémo dar na imàgine de noaltri stési pi vera, desfàndose dei stereòtipi che la TV e i giornali i tende ancora a mostrar.

Chi che pol aderir
Xe invità a far parte de 'sta réte de coordinaménto tute le asociazsion, senzsa scopo de lucro, inpegnàe a promóvar la cultura, la léngua, le tradizsion, la storia del Vèneto de jeri e de ancó. I primi contati i xe stài stabilìi co le asociazsion de Basan e dinturni ma ghe xe xà dei raporti de colaborazsion co grupi de altre provinzsie che a só volta i podarà promóvar sul só teritorio na réte come questa.

Vantaji
Pì vixibilità par le asociazsion, grazsie a la creazsion de un sito Internet indove che ognuna de lore la podarà prexentar la só storia , el canpo in cui la lavóra , el calendario dei inpigni, i referenti de l' asociazsion;

vien fazsilità la conosenzsa e i rapòrti fra le asociazsion stése, che le podarà crear eventuali ocaxion de colaborazsion;

vien favorìa l'esportazsion de le inizsiative anca coi nostri fradeli Vèneti 'ntel mondo grazsie ai contati co asociazsion de Vèneti a l'èstero;

se podarà conósare e contatar grupi culturali de altre provinzsie cusì che a tuti ghe vegnarà oferta la posibilità de slargar el proprio canpo de intervento;

col tenpo se formarà na nóva imàgine culturalmente avanzsà del Vèneto che la scardinarà i veci stereòtipi ancora prexentài da TV e giornali.